جوجو وهي تشهق من البكا تقول : هيا منار ضربتني وعضتني هنا شوفي كيف وإنتي كمان تضربيني

أمي تحاول تهديها : خلاص طيب لا تبكين أنا ضربتكم كلكم عشان أنتوا  بنات خالة ما تتضاربون

جوجو: كيف تضربيني وأنا ما سويت شي  وتأخذ نفس من البكا وتكمل أنا أصغر وحدة في العائلة أصغر وحدة فبناتك

و مازالت تبكي :يدي تعورني شوفي كيف صار فيها خطوط .

أمي تمسح على يدها وتردد: بسم الله عليكِ بسم الله عليكِ خلاص ذحين يروح

جوجو: أبغى أروح عند الطبيبة مو الطبيب الطبيبة تسوي لي عملية في يدي وتحط شاش كذا وتأشر على يديها وعلى رقبتها .

أنا بطني صار يمغصني من كثر ماني ماسكة الضحكة يالله يا عليها كلام

أمي : خلاص طيب بكرة نروح مع السواق وإلالما أبوكِ يجي من المدينة أوديكي خلاص لا تبكين

جوجو مستمرة في الشكوى : هما ضربوني من غير سبب أنا ما سويت شي

أمي : إنتوا أخوات ليه تتضاربون الشيطان بعدين يطالع فيكم وينادي أولاده يضحك عليكم

جوجو تغير الموضوع ومستمرة في البكا : بسومة تقول ما تشتريلي سرير جديد

أمي : إلا حنشتري لكم إنتي وتوتا زي بعض

جوجو: لا أنا أبغى لوحدي السرير فوق وتحت مكتب وتلفزيون صغير زي الحاسوب تحطون لي المجد للأطفال لوحدي

أمي تهز راسها وتقول : طيب طيب

جوجو: وكمان أبغى جوال بكاميرا

أنا في نفسي : كااااااااااااااااااااااااااااي ابشري

أمي : طيب خلاص وتضمها

أنا مازلت متابعة للموضوع بصمت وبعد لحظات

جوجو: أمي الله لما يحط الشيطان في النار ايش يصير له ؟؟

أمي : ينحرق وأنتوا عشان تــ..

جوجو تقاطعها وتبكي : لا تقولين لا تقولين

عرفت إن أمي بتقلب الموضوع عليها وإنهم فرحوا الشيطان ومن هذا الكلام

وسكتت بعدين قالت جوجو :أنا ما أبغى الطبيبة تسوي لي عملية بس تحط ليا شاش

ههههههه غيرت رأيها

أمي :طيب

أنا قمت غسلت وجهي وطلعت من الغرفة ورحت عند خالتي وحكيتها عن جوجو وجلسنا نضحك على براءتها  لها جو خاااص في البيت 

اليوم الثاني أقول لأمي :اشبها جوجو كلامها فضيع بس أهم شي الجوال هاهاهااااي

أمي : بعد ما رحتي قالت لي كلام بكاني

أنا : أوف ايش قالت ؟؟

أمي : تقول إنتوا بس تضربوني وما تحبوني يا حبيبتي يا جدة خلاص ماتت وراحت أنا أبغى أروح عندها أبغاها

أنا أحاول أضغط على نفسي الدمعة على طرف عيني :الله يعين . ابويا لا يسمعها.

خالتي قالت : بس جينا وقلبنا عليها المواجع

كلنا افتقدنا جدتي الله يرحمها .... بس بالله في بنت لزيزة وطعمة زي لجين طبعا ما في..